على شرف معمول العيد

كل عام وأنتم بخير حبايبي
حبيت أكتب تدوينة عن مكة والحج وكيف أقضي هذي الأيام من منظوري ومحيطي وحبيت أتكلم عن شعوري وقصة حجتي ومافضيت إلا الان أكتب وأنزلها ويارب تستمتعوا بالتدوينة 
متى نحج ؟
صراحة عني أشوف الإنسان يبدأ يحج وقت مايحس بالرغبة والنضج والقلب والمشاعر تكون فاهمة ايش يعني حج لذلك أنا الأن أقوم بالتشجيع على موضوع الحج لأخواني وأختي اللي أصغر مني ابغاهم يفكروا بالموضوع وياخذوه بشكل جدي مو هب دب وعلى الحج  ابغاهم يستشعروا معنى الحج كثير ناس تجبر أو تأخذ أبنائه للحج وهما غير مستعدين الموضوع يحتاج له تهيئة واستعداد واستشعار من وجهة نظري
كيف كانت حجتي بعض من المواقف اللي ظلت في ذاكرتي ؟
*حجيت بعد زواجي مع أم زوجي وبناتها وبعض القريبات زوجي رفض يبغانا نحج مع بعض ولكن أصريت لأني ما أضمن ايش ظروفي حتكون السنة الجاية مدام الفرصة جات لحدي واقتنع ورضي .
*مرة كنت متلخبطة فرحانة وخايفة ورحت جمعت كل محاضرات الدنيا وكل الدروس عن الحج هههههههه وأخر شي تنحت وقلت يابنت اتركيها على الله وقلت لأمي علميني كيف أحج قالت سوي زي مايسوو الناس ههههههه خير نصيحة والله .
*المهم كانت الحجه مع حملة تمشي الحال وصلنا العمارة استأذنا بتبادل الغرف وصرنا كلنا بغرفة وحدة انسوا شي اسمه حج مع قروب بنات المهم أنا كنت مطنشه الوضع مركزة على نيتي وحجتي ما ابغاها تخرب ههههههههه.
* الوضع في العمارة مع الحملة  اننا أهل نروح مع بعض نعلم بعض نساعد بعض مع مختلف الأجناس يعني أول شعور ومعنى حسيته قد ايش قريبينا من بعض رغن اختلافنا قد ايش نيتنا طيبة طبعاً هذا اللي ظهر لي من تعامل الناس مع بعضهم .
*أكثر شي خوفني الباصات السواقين مرعبين جنون أحس سواقتهم رعب كنت أطلع أنام فورا غصب عني ما أقدر أسولف مع أحد وأقول أني خايفة من سواقة السواق فاكنت أنام فعلا والبنات يضحكون علي وافتكر حصلت مضاربة قدام عيني مع السواقين وكسروا القزاز  والناس تقول حج ياحاج حج ياحاج نزلت من الباص وشردت في مزدلفة ابغى أبعد بأي طريقة من عندهم.
*من الصور اللي أتذكرها الخيمة اللي وصلنا لها يعني كمية الحريم فيها زحممة وحر وهنا حرمة تبكي وهناك حرمة تدعي وخلفي وحدة تشخر والثانيه تهوي انا متربعة واهفف على نفسي واذكر نفسي بالذكر وشوي ادوخ واخذ لي غفوة .
* فعلا تخيلت يوم الحشر الوان واجناس وناس وبشر واستعدينا للنفرة ااه أكتب وعيني دمعت الانسانية والروحانية والتلبية يااااالله شي رهييب فصلت على العالم صرت امشي لحالي وماخفت اني اضيع العلم تبع حملتي امشي وراه وجوالي معايا وبعدت عن البنات وصرت اتفرج وامشي وادعي لين وصلت الباص.
* كانوا البنات يسموني دب الباندا اكون جالسة متربعة في السالفة معاهم وفجئة افصل وانام واقولهم لا لا مابنام ههههه طبعا ما انسى اني ضعت مع اخت زوجي ورفض العسكري نرجع للخلف الا نمشي وناخذ لفة طويلة وعصبت وتركتها وكل وحدة مشيت مع نفسها هههههه لين وصلنا لأهلنا .
*تذكرت وقت ماقررنا نروح للحرم مع تكسي طبعاً نشبت معانا وحدة عجوووز مرة جنوبية قالت إلا أنا بروح معكم طيب بنتك وين قالت ماعلي منها طيب ياخالة علميها انك بتروحين قالت أبداً هيا بتتصل واقولها اني رحت اطوف صدق النشبة صح وركبنا واحنا نفكر كيف بنخليها تطوف لحالها واصلا كيف بعدين نرجعها معنا وين نلاقيها وبما أني أنا الأصغر تكفلت بها وقلت أنا بمشي معها وماشاء الله هاتك ياطواف ومشي الصلاة على النبي ياخالة انا تعبت بريح وتتحلطم عليا جنوبي ما أفهم وش تقول يازيناه الله يذكرها بالخير ويحسن خاتمتها.
وعيد الأضحى كيف بيكون ؟
لأهل مكة دائماً يقولو مافي عيد ليييش لأنه أهل مكة مشغولين يعني غالباً رجالنا في أعمال الحج سواء عمل أو تطوع وحتى نسائنا عندنا حدث أعظم عندنا ضيوف مشغولين معاهم 
فيه ناس تسافر ماتحب تقضي الحج في مكة 
عني أنا أحب مكة في الحج ولا أحب أخرج منها أسكن في منظقة قريبة من المشاعر أحب أشوف الحجاج أشوف سيارت العسكر أشوف العسكر أسمع الطيارات صح زحمة ولا أقدر أخرج وأدخل أصلا ما أقدر أروح مكان مافي أحد يخرجني غالباً أخواني زوجي أبوي مشغولين في الحج مع ذلك سعادتي في مكة يكفي أتفرج وأحس بالروحانية وكل سنة  نفسي أنزل الحرم يوم عرفة لكن ماتتيسر لي 

ومن هنا تنبع أمنية أتمناها من قلبي ويارب ياحبيبي يكرمني فيها

أتمنى أني أشتغل في الحج تطوع مررررة نفسي فعلاً أنزل وأخدم الحجاج

أسمع المناطق الثانيه أنه عيد الأضحى عندهم فرحته أكبر من عيد الفطر عني أنا استعدادنا أكبر في عيد الفطر  ولا أحب أقول أنه ماعندنا عيد لأنه بكل بساطة هو عيد هو فرح أفرح للفرح ايش المانع 
معمول العيد؟
العام أهل زوجي خبزوا معمول للعيد وزوجي رايح جاي يأكل حبه ورا حبه  لين أمه عصبت وقالت تبغى معمول سويه بنفسك ونادني قال تعلمي من أمي المعمول قالت لا وأنت معها هههههه وفعلا عجنت العجينه وجلست أنا وياه نكور ونحط في القالب وخالتي فوق رأسنا تهزأنا تقول سلاحف مقدار واحد ماقدرتو تخلصوه الأكل حلو وسهل بس شغله صعب  ههههههه واحنا نعطي بعض نظرات تهديد و وعيد 
وهالسنة أول وحدة سويت معمول لحالي لأهلي وأهل زوجي كان شوي مو متقن بعد كذا سويت دفعه لبيتي عشان زوجي ينبسط ههههه ويأكل بالعافية على كيفه وبعدها حبيت أسوي لصحاباتي وفعلا أستمعت ورحت وصلته لهم وكلهم من يوم بلغتهم أني مرسلة لهم معمول جهزوا القهوة 
ماتوفقت في عيد الفطر أسوي الدبيازة لكن في عيد الأضحى تجمل معايا المعمول
وهذي تدوينتي عن العيد وعيد الحج دائماً يكون بالنسبة لي مختلف وماله روتين لأنه نكون ندور لنا جو للعيد مرة في جدة نعيد مرة في الهدا نعيد ومرات قليلة جداً اللي نعيد في مكة.

فكرتان اثنتان على ”على شرف معمول العيد

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s