الكتاب الملهم عقل وقلب

صباح الخير عليكم جميعاً حبايبي.

اليوم جايبة لكم كتاب حلو وبقولكم رأي فيه أشتريته من معرض الكتاب بجدة و راح ينزل عما قريب في مكتبة جرير وللي حاب يطلبه من موقع نيل وفرات هنا     

(ولمزيد من التفاصيل نهاية التدوينة بحط لكم  مدونة الكاتب تقدروا تدخلوا عليها وتشوفو المستجدات عنده)

كانت أول زيارة لي للمعرض يالله قد ايش جلست أزن أزن وأحاول وأقدم إغراءات بس تكفوون نزلوني أشم ريحة هالمعرض (ههههههه) طبعاً من قبل لا يصير بجدة وأنا أتمنى أزوره بس وش يوديني للرياض ويوم صار بجدة أول سنة ماقلت بروح ثاني سنة حاولت كم مرة ويأست بسرعة وهالسنة الحمدالله ربي حقق لي أمنيتي وكانت زيارة رائعة طبعاً أنا جاهزة كاتبة وش الكتب وين أحصلهم بأي دار وكم رقم جناحها بس وصلت للمعرض فهيت بمعنى الكلمة معد أبغى كتبي اللي كتبتها انبهرت بالناس اللي ماشاء الله تبارك الله معاهم شنط سفر صغيرة فيها كتب والمؤلفين وأشكال وأنواع الكتب من شتى بقاع الأرض عالم ثاني من جد معد ابغى أشتري ابغى أتفرج واستكشف بس لأن الوقت قصير وزحمة نوعاً كان يوم الجمعة رجعت لعقلي وللأشياء اللي مسجلتها وخلي الاستكشاف والاستمتاع السنة الجايه اذا ربي مد في عمري ان شاء الله .

أول جناح في وجهي كان موجود فيه كتاب عقل وقلب للأستاذ يزيدبن حمد التميمي

عقل وقلب

مباشرة طلبت الكتاب فتحت صفحة الفهرس وشفت المقدمة حسيت ماني قادرة أركز حاسبت عليه سواء اتصفحته أو لا كنت بشتريه بتقولون ليش؟؟ لأن فيه عنصر تشويق وهو أن الكاتب مدون في مدونته كيف كتب هالكتاب وهالشي جداً مشوق بالنسبة لي أشوف النتيجة 

أنا استقيت تجربتي وخبرتي في الزواج من نفسي أولاً (وقفت وطحت وقفت وطحت أمشي وأتعثر وأقوم وهكذا) ومن بعض البرامج التلفزيونية ومن قرائة تغريدات بعض المستشارين المختصين وحسابات الانستقرام ومن مجالس الحريم (عاد المصدر الأخير بلوة) وبعض الكتب الغير مختصة في الزواج كتب تطوير الذات اللي علمتني كيف أتعامل مع الناس عموماً ومن ضمنهم زوجي 

جربت أطلع على كتب عن الحياة الزوجية أول شي عنوانها كان يسد نفسي(الرومانسية الزوجية-الزوجة العاشقة-عسليات ومدري ايش)عن نفسي هذي العناوين ماتجذبني أبداً ثانياً محتوها مكرر ومعروف أطيعي زوجك حافظي على بيتك احترمي زوجك والزوج لازم يوفر معيشة طيبة وهكذا (كل ذا الكلام صح ولازم يصير بس أنا أعرف هذا الكلام ما أضاف لي شي)

وأشهر كتاب عن الحياة الزوجية هو كتاب الرجال من المريخ والنساء من الزهرة (أنا ما قرأت الكتاب معرف ليش يعني ماحسيت باهتمام له من كلام الناس حسيته كتاب يعلمك الفروق بين الرجل والمرأة في التفكير والتواصل وهالأشياء اكتفيت منها من مصادري السابقة)

لو الكتاب صور لك البعد بين المريخ والزهرة فالكاتب( أستاذ يزيد التميمي) أبدع في تصوير العقل والقلب  العقل (الرجل) +القلب (المرأة)= الجسد (الزواج) بالله في أحلى من كذا تشبيه 

 بعد وقت طويل عرفت إن الاختلاف ميزة وإن الاختلاف هو اللي يحلي الحياة الزوجية أصلاً والمهارة في أننا نختار من اختلافنا سلوكيات جديدة ترضينا ونوصل لحل وسط عشان نقدر نعيش مبسوطين بحب  تعلمنا أنا وإياه أشياء كثيرة من اختلافنا الفطري ومن اختلاف عاداتنا وتقاليدنا لين صرنا نضحك ونشوف الشي اللي كان مرفوض من كلا الطرفين تغير وحبيناه وقدرنا نتخلص من أمور كثيرة كنا حابين ننقلها من أسرتنا لحياتنا الأسرية من باب تجاربنا اللي تعلمناها من محيطانا حاولنا وحاولنا لين بفضل ربي صارت المساحة المشتركة بينا كبيرة بأمور حابين نبنيها مع بعض 

لو بس كل زوجين فهموا هذي النقطة في الزواج وقد ايش فيه مساحة حرة كبيرة بينهم يضعون فيها جماليات تخلي حياتهم سعادة كان ارتاحوا 

شايفين ذا الكلام اللي كتبته من فين جاني إلهامه ؟؟

من كتاب عقل وقلب 

ماراح أقول الكتاب غيرني الكتاب علمني لا الكتاب الهمني فعلاً كنت حاسة بقلبي بضيقه عن النظرة اللي حاصلة عن الزواج (وعلى فكرة حياتي الزوجية ماهي مثالية لين اليوم نختلف بس فيه داخلي قناعة وإيمان أن كل يوم بنصير احسن وحياتنا تتحسن بالتدريج)

تحصلون في الكتاب الآتي:

-يبنى لك نظرة عن كيف الحياة الزوجية تكون وفيه إنصاف للطرفين 

-كُتب بصدق وكُتب بمشاعر حقيقة (يعني الكاتب ماتخيل شي وتمناه أنه يحصل لا اللي كتبه عن الحياة الزوجية شي مرة صادق وحقيقي كل زوجين يقدرون يوصلون له عشان يعيشوا حياة كويسه) محد فينا يبغى يتزوج عشان يعاني نبغي نتزوج عشان نعيش حياة أفضل وحياة حلوة 

-الكتاب فيه مستوى وعي من متوسط إلى عالي لغة بسيطة سلس فيه عمق يخليك تفكر متأكدة مرررة أنه أقل شي يخليكم تقولون باقي أمل نتحسن ونتغير 

-الكتاب ذو قيمة و يسوي لك نقله (من معاييري الشخصية للكتب يكون لها قيمة أي فائدة كبيرة أو عظمى ويعمل لي نقله وتغيير في وعيي)

-ونقطة مهمة الكاتب كتب كتابه بعد جهد وبحث وأنا أقدر هذي النقطة له لأنه كف عني عناء البحث وفتح لنا آفق جديد حقيقي أتمنى أن ذا الكتاب يكون فاتحة خير لكتب مختصة في الحياة الزوجية ويُبنى عليه آراء اخرى سواء من نفس الكاتب أو غيره وتتوسع دائرة المعرفة وتتحسن في إنتاج كتب جيدة عن الزواج 

أنصح كل زوجين يشترون الكتاب

-للمتزوجين من فترة إذا معلوماته ما أضافة لكم وكان شي عشتوه ومعروف فاراح يقدم لكم إلهام أو يعطيكم قوة أو تحسون بسعادة فيه إنتماء أنه يعبر عنكم فيه شي حلو يتجدد بداخلكم

-وللي باقي ماتزوجوا خذي الكتاب وإقرئي بتسفيدي يمكن فيه أشياء ماراح تفهمينها لأنك ماعشتيها بس يكون الكتاب مرافق لك كامرجع يوضح لك الصورة وتفهمينها بسرعة وتحسنين الوضع بسرعة عكس لو مافي شي يفهمك ايش الي قاعد يصير .

لو فيه كتاب عن الحياة الزوجية استفدتوا منه أتمنى تكتبوا اسمه لي 

وابغى أعرف رأيكم عن مصادر ثقافتكم عن فكرة الزواج والكتب ايش رأيكم فيها 

وأخيراً اللي قرأ الكتاب ممكن يشاركنا رأيه

وهنا ممكن تتعرفوا وتتواصلوا على مدونة الكتاب أستاذ يزيد اللي حكى وكتب فيها عن تجربته في كتابة كتاب وإصداره ونحن أصدقاء المدونة شاركناه لحظة بلحظة 

استمتعوا في بحر المدونة

أتمنى أني وفيت برأي عن الكتاب ومانقصت لأنه يستحق الإنتشار

تمنيت أحط أقتباسات بس ماقدرت أحترت كثير .

14 فكرة على ”الكتاب الملهم عقل وقلب

  1. اهلا اهلا ,حمستيني للكتاب ، ان شاءالله ينزل قريب ونشتريه ، تصدقي الكتب الي تتكلم عن تطوير الزواج كذا في عالمنا العربي تعتبر معدومه بس في كتاب لطيف ماسمو Act Like a Lady Think Like a Man لستيف هارفلي في نسخه مترجمه اعتقد قرأت حقيقه ملخصو وكان جميل لطيف علمني شغلات جيده وفي كتاب لمستشارة زواج اسمها نورة صفيري يعجبني تفكيرها اتابعها ع السناب كلامها منطقي وراقي اسمو الزواج من a-z اصلا حتي البنات المراهقات اتوقع لازم يقرئو لانو مايركز كثير ع زواج
    اراها جمييله مو زي الباقين الي يفكروو بليالي الملاح وطاعه العمياء ولا حركات الؤم وحبه بحبه

    إعجاب

    1. مرة وحدة شفت كتاب نورة الصفيري في جرير نسيت صراحة محتواه وأسلوبه بس أعتقد مثل ماذكرتي يناسب البنات اللي بتفتح عينها على الزواج وتبدأ تثقف الكتاب مناسب لها جداً
      راح أطلع بإذن الله على كتاب ستيف هارفلي
      كل الكتب اللي بترشحوها وأشوفها على طريقي بسجلها من أجل الإطلاع ثم الإقتناء
      شاكرة لتعليقك وافادتك لنا 🌷

      إعجاب

  2. أهلاً بشاير ، صدقيني قرأت تدوينتك أكثر من ثلاث مرات ،راجعت كل تفصيل تحدثتي فيه عن الكتاب ، غمرني الخجل من كلماتك اللطيفة ، وسعيد جداً جداً بإنه اعجبك و الحمدلله على ذلك كثيراً ..
    قلتي ان الكتاب واقعي في تصويره ومعطياته ، وهذا بالتحديد ما كنت أصبوا إليه بالكتاب ، رغبتي الكبرى كانت بإخراجه بأسلوب المقنع الواقعي وليس الخيالي الحالم ، جميله هذه الملاحظة منك ، شعرت بصدق قراءتك وعمقها بالكتاب .. امنياتي لك بعام سعيد يا بشاير ، وشكرا لك لقراءتك للكتاب وكتابتك عنه. تحياتي مرة اخرى لك بشاير وان نرى تدويناتك القادمة عن الكتب الأخرى التي اشتريتها من المعرض.

    إعجاب

    1. أستاذي الكتاب جاء يترجم أفكاري واعتقادتي التي أعمل بها في حياتي الزوجية والحمدالله وأسأل الله للجميع حياة زوجية هانئة وبنائه وممتعة
      ان شاء الله فيه تدوينات كثيرة عن الكتب بس يارب أقرأ وأفيد وأستفيد
      🌷🌷🌷🌷

      إعجاب

  3. أنا قرأت جزء من كتاب الرجال من المريخ والنساء من الزهرة جميل معرفة الاختلاف والمقارنة بين الرجل والمرأة ذلك ساعد على فهم تفكير الآخر.
    شكراً على مشاركتك للكتاب استمري

    إعجاب

  4. اسم الكتاب مرا لفتني حسيته شي جداً جميل تحست أقرأه بالعادة ما أحب أقرأ كتب عن الحياة الزوجية لأنه زي ما قلتي كلها أسماءها ما تشجع ب هذا اسمه حبيته مرا و مراجعتك حمستني له أكثر

    إعجاب

  5. امممم ماقد جربت اقرأ عن هالمواضيع نفس ما قلتي أشياء اوريدي اعرفها ما احسها فادتني..
    الكتاب شدني اسمه جداً جميل 😻
    يعطيك العافيه ❤ ❤

    إعجاب

  6. ماخطر في بالي أبداً من العنوان إنو الكتاب يقصد الحياة الزوجية ، حبيت التشبيه جداً ..
    مواضيع الثقافة الزوجية تشدني حيل ” مع إني عزباء ” لكن اشوف انها شيء تراكمي مو بفترة وجيزه يقدر الانسان يكون خلفية معلوماتيه عن طريقة التعامل والاختلافات ووو ، خصوصاً انو لازم وقت الجد يكون اوريدي المعلومات في دماغه وفقط يطبق ..
    قرأت و دونت عن كتاب الزواج A-Z للاخصائية نورة الصفيري ، ومكملة تثقيف عن طريق الاخصائيين الاسريين على مواقع التواصل .

    لو لقيت الكتاب أكيد باشتريه بدون تردد ، شكراً لك .

    إعجاب

    1. اهلًا اناستازيا حقيقي انبسطت بوجودك
      صحيح الثقافة المسبقة تجنبك كثير مواقف
      حبيت انك افيدتنا عن تدوينك لكتاب نورة الصفيري
      راح اطلع عليها ان شاء الله💐💐💐

      إعجاب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s